Snøen har vist seg på Sjusete for første gong denne sesongen. Det er dessverre pr i dag (24. nov) ikkje kome nok snø til å køyre opp skikkelege løyper enno, men me vil varsle om det her på heimesida straks løypene er klare. Det er likevel no på sin plass å informere om endringar som er gjort på Sjusete, før vinteren skikkeleg inntek løypene våre.
- Den nye skiskyttarstadionet vår er på det næraste klar, det gjenstår no berre litt småarbeid før resten av blinkane, og nye og betre sidevern er på plass.
. - Plasseringa av standplass i løypenettet vårt, har gitt oss ein del utfordringar når det gjeld fartsretning. Det er viktig for oss å få til eit system som fungerer både til kvardags i trening og mosjonering, og i konkurransesituasjonar både for langrenn og skiskyting. Me prøvde difor i fjor å gå motsett veg i 1 km-trasèen inne på stadion, og hausta delte erfaringar. Komande vinter prøver me difor å gå tilbake til den gamle, innarbeidde fartsretninga.
. - Me held på å montere kortterminal ved innkøyringa til parkeringsplassen, (ved same tavla der betalingskassen er montert). Det skal dermed vere råd å kjøpe både dagsparkering og årskort her. Kvittering for årskort kan ein byta inn i det vanlege plastbelagte årskortet til å ha i bilen. Me kjem tilbake med meir informasjon om dette når terminalen er montert og programmert.
Satsar for årskort vert uforandra, medan dagsparkering vert sett opp til kr 60,-. Kafèen vil også vere betjent med terminal, og me håpar dette vil frigjere mykje dugnadsarbeid som dermed kan setjast inn i andre stadar på Sjusete.
. - I 2008 anla me turtrasèen til Alkleiv og Brotteli, samstundes med at me fekk i stand ein femårsavtale med dei berørte grunneigarane. Før den tid blei det kjørt løyper på årvisse, munnlege avtalar.
Femårsavtalen gjekk ut i år og nokre grunneigarar varsla i fjor, i tråd med avtalen, at dei ikkje kom til å fornye denne, og me kan no stadfeste at me dessverre ikkje har nådd fram med forsøk på fornying. Dette medfører at me i vinter er avskorne frå å maskinpreparere i dei aktuelle trasèane vest for lysløypa.
Me skulle gjerne ha utnytta det påkosta løypenettet i det flotte terrenget ei stund til, men me er likevel takksame for den tida me trass alt har hatt i området.
I år kjem me til å preparere dei andre trasèane som vanleg, og vurderer fortløpande å laga enkle avgreiningar som kompensasjon for tapet av Alkleivstrasèen dersom sjansen byr seg.
Mvh
Styret
Sjusete Skisenter